Góðu børn í 1. flokki.

Hesa vikuna (30/3-3/4) fari eg ikki at leggja nøkur ávís skúlating út til hvønn dagin, men heldur fari eg heita á tykkum um at royna at lesa hvønn dag. Lesið krabbabøkur ella onkrar aðrar bøkur, ið tit eiga heima.

Tað hevði verið gott, um tit onkran dag eisini fara at skriva og tekna myndir til. Eitt hugskot er at skriva eina søgu, har tit skriva eitt sindur hvønn dagin. Tit kunnu senda søguna til mín, um tit hava hug (taka mynd og senda á messenger) - hetta er ikki eitt krav.

Kærar heilsur Elin

26/3-2020

Góðu næmingar, foreldur og avvarðandi!

Landsstýrismaðurin í mentamálum hevur boðað frá, at fyribils verður eingin skúlagongd fyrrenn eftir páskir.

Komandi tvær vikurnar halda vit tí fram við heimaundirvísing, sum verður skipað á heimasíðu skúlans. Summi tykkara hava góða tíð og umstøður annars at hjálpa tykkara børnum við heimaarbeiði, meðan tað hjá øðrum ikki er so. Eisini er ymiskt, hvussu sjálvstøðugt næmingarnir megna at arbeiða. Okkara ætlan er ikki, at heimaarbeiðið skal tyngja gerandisdagin hjá tykkum óneyðugt, men tað hevur týdning at halda næmingunum til og hava eitt ávíst reglusemi í skúlaarbeiðinum, nú skúlin er stongdur.

Um tit hava onkran fyrispurning ella ivamál, kunnu tit venda tykkum til flokslæraran ella læraran í einstøku lærugreinini. Tað ber eisini til at seta seg í samband við leiðsluna umvegis telefon ella teldupost. 

Við teimum fráboðanum, sum higartil eru komnar og tíðspunktið, nær skúlarnir lata upp aftur, so verða próvtøkurnar fyri 9. og 10. flokkarnar hildnar sum ætlað í summar. Men broytist nakað hesum viðvíkjandi, fáa tit nærri kunning um tað.

Landsroyndirnar fyri 4. og 6. flokkarnar skulu sambært ætlan verða 28. til 30. apríl. Kemur broyting í, verða heimini kunnað skjótast gjørligt.

Inni á snar.fo   https://snar.fo/folkaskuli/foeroyskt/1-2-flokkur/   finna tit nógv gott, ið tit kunnu tríva í, meðan vit bíða...

og í rokning    https://snar.fo/folkaskuli/stoeddfroedi/1-2-flokkur/

14/3-2020

Góðu foreldur og børn í 1. flokki.

Eg sendi tykkum brúkaranavn og loyniorð, ið tit skulu brúka, tá ið tit fara at lesa krabbabøkur heima á ibok,nam.fo, meðan skúlin er stongdur.

Hyggið inn á ”Boð og tíðindi” og ”Vikuætlan” á heimasíðu skúlans, har tit síggja, hvat tit skulu gera heima teir næstu 14 dagarnar. Undir "Boð og tíðindi" er eisini kunning í samband við, at skúlin er stongdur. "Skrolla" longur niður á hesi síðu.

Eg havi valt nakrar krabbabøkur, ið tit skulu velja ímillum at lesa. Tó eru tit sjálvandi vælkomin at lesa allar tær krabbabøkur, ið tit hava hug til, inni á ibok.nam.fo.

Gulu krabbabøkurnar, ið eg havi valt, eru eisini ljóðbøkur. So her ber til at hoyra søguna; trýstið á bláa nótan fyri at hoyra tekstin.

Eru spurningar, eru tit vælkomin at seta tykkum í samband við meg á tlf 214058.

Blíðar heilsanir Elin

Kunning í samband við, at skúlin er stongdur komandi 2 vikurnar

Fyribils skulu næmingarnir vera heima í tvær vikur.

Kunning í samband við, at skúlin er stongdur komandi 2 vikurnar

Jenis av Rana, landsstýrismaður í uttanríkis- og mentamálum, hevur gjørt av, at allir næmingar í fólkaskúlanum skulu vera heima við hús skjótast til ber og í seinasta lagi frá mánadegnum 16. mars 2020. Fyribils skulu næmingarnir vera heima í tvær vikur.

Hesar vikurnar arbeiða næmingar og lærarar heimani frá. Tí er neyðugt at fylgja væl við á heimasíðu skúlans og á vikuætlanini hjá flokkinum, har ið kunning um heimaarbeiði o.a. kemur.

Eru ivamál viðv. heimaarbeiði, kunnu tit venda tykkum til flokslæraran.

Næmingar, ið mangla bøkur ella annað úr skúlanum, kunnu heinta hetta í skúlanum leygardagin 14.mars kl. 10.00-12.00

Skrivstovan stongd, eru spurningar kunnu tit ringja til:

Jón Johannesen, skúlastjóri á tlf. 222320 ella

Otto Gram, varaskúlastjóri á tlf. 266637.