13.apr 2021
Lagt út hevur: Annika Eidesgaard
Ónsdagin í farnu viku vóru okra 4. og 5. fl. á ferð. Næmingar og starvsfólk møttu tíðliga ónsmorgun á Krambatanga, men hóast hetta var tíðliga á morgni, vóru øll spent til dagin.
Tá Smyril legði at í Havn, varð farið við bussi til Fuglafjarðar. Leiðin gekk sjálvsagt gjøgnum Eysturoyartunnilin, og bussurin koyrdi eisini eina eyka ferð runt í vøkru og forvitnisligu rundkoyringini. Fleiri av næmingunum høvdu ikki verið har fyrr, so tað var eisini ein uppliving í sær sjálvum.
Í Fuglafjarðar skúla tók virkandi skúlastjórin, Jógvan Dahl, sera væl ímóti. Flokkarnir hjá okum vitjaðu sama árgang í Fuglafjarðar skúla, og bæði 4. flokkarnir, ið vitjaðu 4. flokk, og 5. flokkur, ið vitjaði 5. flokk, høvdu eina sera góða løtu við práti, spæli og hugna, áðrenn leiðin gekk oman í Mentanarhúsið í Fuglafirði, har Leyvukongurin var á skránni.
Tað er sangleikabreytin í Fuglafjarðar skúla (10. fl.), ið framførdi leikin, ið tey sjálvi eisini hava fyrireikað og pallsett.
Ein sera væl spældur leikur, har alt riggaði væl saman (bæði leikur, sangur, pallur, búnar o.s.fr.).
Tá leikurin var liðugur, var aftur tíð at fara við bussi til Smyril, ið førdi næmingar og starvsfólk aftur til Suðuroyar.
Ein sera væleydnaður túrur :-)
Stóra tøkk til stjóra, lærarar og næmingar í Fuglafjarðar skúla fyri góða móttøku og blíðskap og til 10. flokk fyri sera góðan sangleik!
apr. 2024