Ársins várkapping í hádeild (7.-9.fl.)

Ein fastur táttur í skúlaárinum er árliga várkappingin hjá eldru deildunum. Í dag átti hádeildin tørn. 

Frá morgunstundini av byrjaðu kappingarnar, og spenningurin øktist bara til á middegi, tá vinnarin varð kosin. 

Flokkarir blivu í morgun býttir í bólkar, ið síðani skuldu kappast. Kappingarnar úti á Tvøroyri vóru seks í tali: 

- Styvlakast í gamla skúlagarði. Hesa kappingina kenna tey flestu, ið hava gingið her í skúla seinastu mongu árini. Tað er av og á onkur, ið skarar framúr og kastar sera langt. Í dag var tað Stefan í 9. flokki, ið kastaði sera, sera langt - út um skúlagarðin - og tað fleiri ferð eisini.  

- Gita ting undir einum viskistykki. Her vóru nógvir ymiskir lutir; summir lættir at gita, summir truplari. 

- At saga og smíða. Her skuldi eitt træpetti sagast av og so í hin endan av smíðstovuni at smíða ein seym í. Flest træpetti við seymi í = flest stig.

- Forma ein terning við putlibrikkum. Her vóru fleiri ymisk torleikastig. Jú fleiri terningar, bólkurin fekk samlað, jú fleiri stig.

- Nevna djór. Okur eiga nógv ymisk djór í lívfrøði, og saman við fleiri leikudjórum var djórasamlingin stór. Ein og ein næmingur kom inn í lívfrøði og skuldi nevna eitt djór. Tann bólkurin, ið fekk nevnt flest djór tilsamans, fekk sjálvandi flestu stigini. 

- Eitt slag av minnisspæli. Úti í gongini lógu nógv ymisk kort. Ein næmingur í senn slapp at síggja eitt kort, og so skuldi viðkomandi royna at finna eitt eins kort inni í skúlastovuni. Hendan uppgávan var kanska eitt sindur trupulari, enn hon ljóðar. 

Kappingarnar inni í Trongisvági vóru:

- Blindaflogbóltur

- Hockey

- Forðabreyt 

Áskoðarar gera kappingar enn betri, og 3. flokkur var og heppaði eina løtu.

​

Við sera góðari hjálp frá 10. flokki, eydnaðist kappingin sera væl. Tey hjálptu til at skipa og halda kappingarnar og at telja stig saman. Á middegi vóru øll í 7.-9. flokki samlað í høllini og bíðaðu í spenningi eftir úrslitinum. 

Ársins vinnari av várkappingini er 8. flokkur - hjartaliga til lukku :-) 

​