NORÐURLENDSKT SKÚLAKJATT - um jól og siðvenjur

Norðurlendskt skúlakjatt um jól og siðvenjur

Í samband við at evnisdagur var um jólini í norðurlendska skúlakjattinum, ritaðu næmingarnir í 5.b inn á teldurnar tórsmorgunin og kjattaðu við næmingar úr tveimum ymiskum norskum skúlum.

Norðurlendskt skúlakjatt er ein stuttligur máti hjá norðurlendskum skúlanæmingum at hittast á netinum og kjakast um ymisk evni, sum eru ásett frammanundan. Kjatt-tiltøkini geva næmingunum møguleika fyri at hitta javngamlar skúlanæmingar úr hinum norðanlondunum og at skilja líkheitir og munir millum skandinavisku málini. Málini, tey kunnu samskifta á, eru danskt, norskt og svenskt.

Skúlakjattið er eitt snúningskjatt, sum gevur næmingum møguleika at tosa við aðrar næmingar í Norðurlondum. Á skíggjanum eru tveir kjattgluggar - ein sær seg sjálvan í øðrum glugganum og ein tilvildarligan norðurlendskan næming í hinum. Hvørt kjatt er í mesta lagi 5 minuttir, og tað eru ávísir spurningar um evni, sum tey skulu spyrja og svara. Børnini vóru saman í bólkum, og tey vóru røsk at tosa, á gøtudonskum, við tey børnini, sum komu fram á skíggjan og tosaðu norskt. Til tíðir var trupult at skilja hvønn annan, og tá hevði onkur hug at skifta til enskt fyri betur at skilja hvønn annan, men á kjattinum skal samskiftast á skandinaviskum, hóast tað kann vera avbjóðandi. 

Hetta var stuttligt - hetta verður gjørt aftur :-) 

​