Ársins várkapping í miðdeildini

4., 5. og 6. flokkarnir hava glett seg leingi ...

Endiliga var hon aftur á skránni: Várkappingin hjá miðdeildini

Farna fríggjadag var árliga várkappingin í miðdeildini. Byrjað varð beinanvegin um morgunin við kunning í fimleikahøllini, og so byrjaðu kappingarnar. 

Sum siðvenjan er, varð byrjað við kappingum úti á Tvøroyri og so inn til Trongisvágs til aðrar kappingar. Hvør árgangur varð býttur í tvey lið, so fleiri sluppu í leikir í senn, men at enda vórðu stigini hjá hvørjum árgangi sær løgd saman, so vinnandi flokkurin kundi finnast og heiðrast. 

Kappingarnar úti á Tvøroyri vóru ymiskar og spennandi:

• Í alisfrøðistovuni var uppgávan at byggja skap (tangram) upp á tíð. Eini átta ymisk skap vóru, og torleikastigið vaks so hvørt, sum tey høvdu bygt eitt skap.
• Í lívfrøðistovuni skuldu tey kenna djór. Eini 50 djór vóru stillað fram, og so runnu tey, eins og stafet, ein og ein av bókasavninum inn í lívfrøði at vita, um tey kendu djórini.
• Í smíð skuldu tey saga og negla. Ein skuldi saga av einum træpetti og síðani renna yvir til ein annan, ið skuldi negla ein seym niður í træpettið.
• Í evning skuldu tey føla seg fram og kenna lutir. Ein og ein skuldi renna inn og stinga hondina í ein kassa, nerta vit lutin og gita, hvat tað var.
• Í gongini var skamlastafett. Alt liðið skuldi upp á skamlar at standa á rað. Aftasti skammulin skuldi takast av gólvinum og handast framum, so øll kundu flyta seg eitt fet frameftir.
• Í fimleikahøllini var koyrt á rullibrettum. Tá ein á rullibretti kom á mál, slapp næsti avstað. Hvussu nógvar umgangir á breytini kláraðu tey í 10 minuttir?

Klokkan 9.45 koyrdu skúlabussarnir øll inn í høllina. Høllin var býtt upp í tríggjar banar: Hockey (hvørt lið spældi fýra dystir), fótbóltur (hvørt lið spældi fýra dystir) og forðabreyt (hvussu ofta megnaðu tey koma runt á breytini upp á 5 minuttir)?

Kl. 12.00 vóru kappingarnar lidnar. Spenningurin var stórur, tá farið varð at telja upp, men ein vinnari varð funnin: 5. flokkur - hjartaliga til lukku!

5. flokkur vann ferðasteypið og mátti stilla upp til myndatøku, tí í skúlanum hava okur ein "Wall of Fame", har allir vinnararnir av ítróttardøgunum hanga, og tað er kanska størsti vinningurin av øllum :-)