23.sep 2021
Lagt út hevur: Annika Eidesgaard
I Sandhedens tjeneste – keldukritikkur, falstíðindi og etikkur
Yvir 32.000 næmingar í 8., 9. og 10. flokkum í danska ríkinum hava í dag luttikið í einum beinleiðis netbornum tiltaki við heitinum I Sandhedens Tjeneste. Í hálvan annan tíma varð sjóneykan sett á sera viðkomandi evnini keldukritikk, falstíðindi og etikk. Millum góðu 32.000 næmingarnar vóru eisini okra 8. og 10. flokkar umframt næmingar á Føroya Eftirskúla, ið sótu í Tvøroyrar skúla og luttóku aktivt í tiltakinum.
Í beinleiðis sendingini fylgdu okur eini søgugongd, har okur fyrst fingu at vita, at ein stór spreinging var hend. So við og við fingu okur meir at vita, og av og á gjøgnum sendingina skuldu okra næmingar taka støðu til ymiskar spurningar, ivamál og tvístøður. Hvussu skjótt kann ein tíðindamiðil siga frá eini hending? Hvussu nógv skulu tey vita, áðrenn tey kunnu bera tíðindini? Hvørjar myndir kunnu deilast? Kunnu okur líta á vitnini?
Evnini, ið vórðu viðgjørd, eru sera áhugaverd og týdningarmikil, og tey eru samstundis sera viðkomandi í dagsins samfelag, har okra næmingar og okur øll onnur allan dagin hoyra, síggja og lesa tíðindi um alt møguligt. Ikki er tað altíð lætt at rokna út, hvat passar, og hvat ikki passar.
Hetta er 7. ferð, at DR skipar fyri hesum tiltakinum. Í ár vóru tað Erkan Özden, vertur á TV-Avisen, og Annika Wetterling, vertur á YouTube-rásini hjá DR-tíðindadeildini, ið vóru vertir fyri tiltakinum. Hetta er fyrstu ferð, at Tvøroyrar skúli luttekur, men væntandi verður tað ikki seinastu ferð.
Grein á dr.dk í dag: https://www.dr.dk/om-dr/nyheder/30000-fik-besoeg-af-annika-og-erkan-i-klassevaerelset
apr. 2024