KONSERT OG MÓÐURMÁLSKAHOOT

Várkonsert og móðurmálskahoot 

Várið er komið, og okur síggja nú endiliga aftur ein gerandisdag, sum tann, okur kendu, áðrenn korona kom og broytti heimin. Hetta merkir, at okur í skúlanum endiliga aftur kunnu samlast í størri bólkum. Morgunsangurin er aftur á skránni, og tað gleðast okur øll um.

Í morgin, fríggjadagin 25. mars, verður tónleikur í miðdeplinum í Tvøroyrar skúla.

Hjá innskúlingin í Trongisvági verður ein sang- og hugnaløta við Tróndi Enni klokkan 10.00. Fyrstu tveir timarnar er vanlig undirvísing, og skúladagurin endar klokkan 11.20, tá bussur koyrir næmingarnar heim.

Úti á Tvøroyri er eisini vanlig undirvísing tveir teir fyrstu tímarnar, men so verður farið við 4.-9. flokkunum í SALT til eina konsert við navnframu tónleikarunum Lenu & Niclas og Guðrið Hansdóttir.

Klokkan 11 er ein steðgur í konsertini, og tá er kahoot á skránni til eldru flokkarnar. Í samband við, at 25. mars er móðurmálsdagur, skipar Málráðið aftur í ár saman við Føroyar Lesa fyri einari kahoot-spurnakapping í føroyskum bókmentum og máli. Heitt verður á allar næmingarnar í 7.-9. flokki at taka kahoot-appina niður á telefonina.

Skúladagurin endar klokkan 12.00, tá bussar koyra næmingarnar heim.