Góðu foreldur,
Tykum kunnugt, verður Tvøroyrar skúli partur av rørsluátakinum Fit First. Hetta er ein granskingarverkætlan, ið er knýtt at Fróðskaparsetri Føroya, og leikluturin hjá Tvøroyrar skúla er í fyrsta umfari at vera eftirlitsskúli, meðan Vágs skúli fer undir fulla rørsluátakið. Hóast okur ikki er eins virkin partur av verkætlanini sum Vágs skúli, krevur tað, at foreldur/verjar geva sítt samtykki til, at børnini eru við í kanningini.
Okur hava fingið fleiri fyrispurningar um hesar samtykkisváttanir. Serliga snúgva spurningarnir seg um familjur, har eitt nú pápin siglir og tískil ikki er heima til at undirskriva samtykkið.
Sambært Helga Winther Olsen, verkætlanarleiðara, ber til at senda samtykkisskjalið (viðlagt niðast í hesi grein) við telduposti, undirskriva og senda skannaða/avmyndaða skjalið aftur.
Eisini ber til at senda eina fullmakt í teldubrævi, ið so kann latast flokslæraranum. Orðingin í fullmaktini kundi eitt nú ljóða soleiðis:
Til verkætlanarleiðara
Eg, ”navn á burturstaddum foreldri/verja” gevi hervið ”navn á foreldri/verja heima” fullmakt at skriva undir samtykki um luttøku í FIT FIRST granskingarverkætlan í Vágs og Tvøroyrar Skúla fyri barn okkara ”navn á barni”.
Vinarliga heilsan
Navn á foreldri
Dagfesting og staður
Kunningarskjalið um verkætlanina er eisini viðlagt niðanfyri.
Aftur
10
dec. 2023