100 dagar í Glugganum
- tann: 23.01.2024
- Lagt út hevur: Annika Eidesgaard
Í dag er lýsing sett á heimasíðuna hjá Tvøroyrar skúla um innskriving í forskúla og 1. flokk komandi skúlaár, og júst í dag er hátíðardagur í Glugganum.
Fyri knøppum hálvum ári síðan møtti ein spentur bólkur av børnum í Glugganum, spildurnýggja forskúlanum á Tvøroyri. Nú eitt knapt hálvt ár seinni hava tey í dag hátíðarhildið skúladag nummar 100 við stuttligari veitslu, har báði dansur og stóra kalda borðið vóru á skránni. Harumframt hendi tað forkunnuga, at lærarin, Juanita, av tilvild hevði funnið eitt sjórænarakort og -flagg uttanfyri, og tað mátti sjálvandi kannast. Við góðum samstarvi eydnaðist tað at finna skattin, ið var ein skattakista við góðgæti. Heppið, at hetta hendi júst hendan hátíðardagin :-)
Hundrað dagar er ikki nógv í stóru heildini, men hjá einum barni, eru tað nógvir dagar; dagar, ið eru fyltir við spælandi lærdómi, spennandi virkisvitjanum, práti, spurningum, spæli, hugna, jólaverkstovum, jólahaldi, floksfeløgum og øllum "harímillum"; øllum tí, ið fylgir við einum virknum barnalívi.
Hjartaliga til lukku við teimum 100 døgunum, Gluggin! :-)
Fyrsti skúladagur í Glugganum
Túrur í kolaminu í Hvalba
Túrur á Taravirkinum í Fámjin
Starvsfólk í Glugganum eru Juanita, ið er lærari, Karin Kristina, ið er námsfrøðingur umframt Shaila og Rannfríð, ið eru stuðlar. Í løtuni er Sunnvá eisini í starvsvenjing í Glugganum.
Aftur
15
jan. 2025