11.nov 2021
Lagt út hevur: Annika Eidesgaard
Týsdagin 9. november var næmingaráðið í Tvøroyrar skúla og vitjaði mentanarnevndina hjá Tvøroyrar býráði.
Fleiri ferð hevur okra næmingaráð vitjað Tvøroyrar býráð, og í ár var tað mentanarnevndin, ið hevði boðið ráðnum á vitjan.
Eitt fullmannað næmingaráð møtti spent til fundar, og tey vórðu væl móttikin. Anita Vibergsdóttir, forkvinna í mentanarnevndini, beyð vælkomin og greiddi frá, at tey í mentanarnevndini og býráðnum um heild gjarna vildu hoyra, hvat næmingaráðið tekst við, og hvat tey halda um ymiskt viðvíkjandi skúlanum.
Næmingaráðið tosaði á síðsta næmingaráðsfundi um hesa vitjanina, og tey valdu tá nøkur punkt, ið tey - saman við floksfeløgum - mettu týdningarmikil at loysa/broyta um møguligt. Hetta løgdu tey fram fyri mentanarnevndini, og tað var væl móttikið. Tey fingu góða frágreiðing og lyfti um, at tey avgjørt vildu kanna, um tað bar til at gera hesar broytingar, næmingaráðið ynskti.
Næmingaráðið og skúlin takka býráðnum fyri, at tykur regluliga bjóða ráðnum á vitjan, og at ráðið altíð verður væl móttikið.
Næmingaráðið er mannað av einum umboði úr hvørjum flokki frá 4. til 10. flokk. Ætlanin er í næstum at víðka um næmingaráðið, so tað onkursvegna eisini fer at fevna um innskúlingina, ið húsast í Trongisvágs skúla.
mar. 2024