SSP- undirvísing um góðar miðlavanar

SSP, ið er ein tvørfaklig samstarvsskipan millum skúla, sosialar myndugleikar og politiið, vitjar á hvørjum ári allar fólkaskúlar (og aðrar stovnar). Talan er um ymiska undirvísing og ymisk tiltøk, ið verða tillaga aldurbólki og evni. Í dag hava 4. og 7. fl. havt vitjan av SSP-ráðgevanum Súsonnu í Króki, ið hevur undirvíst teimum um sera viðkomandi evnið "góðar miðlavanar". 

Tveir tímar vóru settir av til hvønn flokk, og hesir tveir tímarnir í hvørjum flokki sær gingu skjótt. Súsanna tosaði um sosialar miðlar, málburð, spøl á netinum, privatlív, happing á netinum, og hvussu okur eiga at uppføra okum. Á skránni vóru eisini spøl, lættir aktivitetir og eisini prát og nakað av kjaki um ymiskt viðkomandi. 

Í kvøld var eisini foreldrafundur fyri foreldrum í 4. flokki (hetta er partur av tilboðnum til allar 4. flokkar, sí nærri her). Her fingu tey foreldur, ið vóru til staðar, høvið at hoyra um, hvat næmingarnir høvdu tosað um fyrr um dagin (hetta við samtykki frá næmingunum, sjálvandi), og so var tíð til eitt gott prát og kjak um góðar miðlavanar. 

Eitt týdningarmikið sjónarmið, ið kom fram á degnum og lagt fram á fundinum, var, at hóast børn og ung saktans kunnu skipa fyri góðum løtum uttan uppíblandan av teimum vaksnu, so eru tað serliga skúlaløturnar saman í felagsskapi - løturnar, ið eru samskipaðar eitt nú av starvsfólki í skúlanum og/ella foreldrum - ið tey minnast aftur á við stórari gleði. Hjá 4. flokki var hetta serliga tiltøk, ið vórðu løgd til rættis av lærarum og foreldrabólkinum, so sum hugnakvøld og útferðir.

Heimasíðan hjá SSP

(Myndirnar niðanfyri vórðu tiknar í 4. flokki í dag)