“Kajakrógving á Leitisvatni” ístaðin fyri “Riverrafting í Spania”
Sum so mangir aðrir næmingar í Føroyum høvdu vit í 9.fl. í Tvøroyrar skúla eisini glett okkum almikið til at fara eina uttanlandsferð saman á vári 2020 (tá gingu vit í 8.fl.).
Ferðin var væl til rætta løgd, og alt var klárt.
“Mongum brestur ætlan”, og so varð eisini hjá okkum. Covid19 kom og legði sína køldu hond yvir okkum øll.
Eina tíð vistu vit hvørki út ella inn, men eftir summarfrítíðina byrjaðu vit at arbeiða við 2. og 3. loysn til Danmarkar, sum heldur ikki bleiv til nakað, tí støðan broyttist alla tíðina í londunum uttanum okkum.
Í september varð endalig avgerð tikin. Vit valdu nú, at námsferðin skuldi verða í Føroyum fyrru helvt av oktober. Námsferðin var í vikuni beint undan heystferiuni.
Nú var enn einaferð nógv at kanna og fyrireika, men tá Smyril legði frá landi av Krambatanga mánamorgunin 5. okt. kl. 06.00, vóru 27 spentir næmingar og 2 glaðir lærarir umborð.
ENDILIGA upprann dagurin :)
Hetta var nakað av tí, sum vit upplivdu:
- Vitjan á krígssavninum í Vágum (við heimildarfólki)
- Róðu í kajak á Leitisvatni, út til Bøsdalafoss og aftur
- Vitjan í heiminum hjá Mikkjal á Ryggi (við heimildarfólki)
- Vitjan í kirkjuni í Sandavági (við heimildarfólki)
- Vórðu boðin inn í Missiónshúsið í Sandavági, har vit ótu matpakka og fingu heitar pannukøkur frá sera gestablíðum “sandavágsingum” :-)
- Ótu góðan bita á Angus í Tórshavn
- So gekk leiðin til Klaksvíkar, har vit svóvu tvær nætur á Hotel Klaksvík
- Vitjan í viðalundini og í Kunoyarbygd
- Vitjan í kirkjuni á Viðareiði (við heimildarfólki)
- Ótu á Hotel Norð
- Vitjan á nýggja og framkomna fjósinum á Viðareiði
- Vitjan í húsinum hjá Nólsoyar Páll í Klaksvík (Archibald Black var heimildarmaður)
- Ótu á Amarant í Klaksvík
- Vitjan í Christianskirkjuni (Marjun Lómaklett tók ímóti og greiddi frá)
- So gekk leiðin til Gjáar, har vit yvirnáttaðu eina nátt á Gjáargarði
- NAX skipaði fyri “teambuilding” - vit sigu niður í gjónna, skutu við luftbyrsu og runnu postarenning.
- So gekk leiðin suður til Havnar, har vit skrivaðu okkum inn á Hotel Føroyar.
- Ótu á Hvonn
- Vitjan á Býarsavninum í Havn.
- SMS - :-)
- Vóru til landsdyst á Tórsvølli til U21 dyst millum Spania og FO. Ungu spaniólarnir búðu eisini á Hotel Føroyum, meðan vit búðu har, so tað var ikki minni stuttligt
- Bowlinghøllin: har vit ótu ein góðan bita, og síðan bowlaðu vit
- Góðan film í Havnar BIO :-)
- Ein fríløta fríggjadag fyrrapart
- Suður fríggjadag kl. 13.00.
Vit kunnu leggja afturat, at vit høvdu ætlanir um eisini at vitja Løgtingið, Mat- og moldháskúlan á Sandi, Kemilux, MBM og Tjóðsavnið, men av ymiskum orsøkum bar hetta ikki til.
Vit eru øll 29 samd um, at vit høvdu ein fantastiskan túr. Vit kunnu sanniliga viðmæla eina tílíka seturskúlaferð í Føroyum.
Lærarar, ið vóru við á ferðini, vóru flokslærararnir í 9. flokkunum, Anna Thomsen og Hildur Túná Fjørdal, ið eisini hava skrivað hesi orðini til heimasíðuna.
Aftur
27
apr. 2024